InicioSociedadeIsabel Pardo de Vera, Medalla de Vigo por "sacar a cidade do...

Isabel Pardo de Vera, Medalla de Vigo por “sacar a cidade do illamento ferroviario”

Marea e BNG piden que se conceda a Medalla da Cidade aos traballadores e traballadoras que organizaron a folga xeral do 1972.

PUBLICADO O

A secretaria de Estado de Transportes, Mobilidade e Axenda Urbana, e expresidenta de Adif, Isabel Pardo de Vera, recibirá a Medalla da Cidade de Vigo, por sacar a cidade do “illamento ferroviario”, co seu impulso á conexión de AVE por Cercedo, ao saída sur e á nova estación.

Así o manifestou o alcalde, Abel Caballero, quen avanzou en rolda de prensa que Pardo de Vera será recoñecida como “gran impulsora” das comunicacións ferroviarias desde Vigo. Entre os seus méritos, o rexedor lembrou que foi ela a que impulsou, desde Adif, a contratación do estudo hidroxeolóxico para o trazado de AVE Vigo-Madrid por Cerdedo. Tamén subliñou o seu papel no impulso da saída sur ferroviaria e na configuración da nova estación de Urzáiz, que “cambia a forma de entender a cidade e a saca do seu illamento ferroviario”.

Por outra banda, avanzou tamén outros nomes de persoas e entidades que serán Vigueses Distinguidos: o Colexio Vivas, o Colexio Fogar Afundación, o Marcote Aceimar, o Politécnico Marítimo-Pesqueiro e, ‘in memoriam’, Carlos Alonso (comuneiro en San Andrés de Comesaña), Pepe ‘Xeito’ (impulsor da celebración da Reconquista) e Vicente Rodríguez Abeijón (músico e escritor).

Estes recoñecementos súmanse aos Vigueses Distinguidos xa anunciados para este ano: o economista Antón Costas, o Centro Alborada, o Centro Veciñal e Cultural de Valladares, e varios centros educativos que cumpren 50 anos (Don Bosco Salesianas, CEIP Ría de Vigo, San Salvador de Teis e Eduardo Pondal). Tamén se nomeará Vigueses Distinguidos ao escritor Domingo Villar, a Unión Deportiva Santa Mariña de Cabral e a Escola Oficial de Idiomas.

A gala de entrega destes recoñecementos e da Medalla terá lugar o 23 de marzo no Teatro Afundación, e enmárcase nas celebracións da cidade con motivo da Reconquista, Festa de Interese Turístico Nacional.

PROPOSTA DE MAREA DE VIGO E BNG

Como cada ano, o resto de grupos municipais fixeron tamén as súas propostas para o nomeamento de Vigueses Distinguidos. No caso da Medalla da Cidade, Marea e BNG apuntaron na mesma dirección, suxerindo que se conceda esa medalla aos traballadores e traballadoras que organizaron a folga xeral do 1972.

Así, no ano en que se cumprirá o 50 aniversario dese episodio histórico, ambos os grupos queren que se recoñeza o labor dos homes e mulleres que, nun tempo sen sindicatos e sen liberdade, arriscaron as súas vidas loitando pola liberdade. Tanto a concesión dos galardóns de Vigueses Distinguidos como a Medalla da cidade deberán ser aprobados en pleno. A maioría esmagadora do grupo socialista permitirá que as propostas do goberno local saian adiante sen contratempos.

ÚLTIMAS

Gonzalo Caballero proposto polo PSOE de Vigo como candidato galego ás europeas

A asemblea do Partido Socialista de Vigo propuxo ao que fora secretario xeral do PSdeG, Gonzalo Caballero,...

Claudio Giráldez renova como adestrador do Celta ata xuño de 2025

O adestrador galego Claudio Giráldez renovou este xoves o seu contrato como técnico do RC...

Atraso de 40 minutos na liña A Coruña-Vigo por un conato de incendio nun coche do tren

Un conato de incendio declarado entre dous coches dun tren que cobre a liña...

Vigo supera de novo os 300.000 habitantes, “de longo a maior cidade de Galicia”

O alcalde de Vigo, Abel Caballero, anunciou que a cidade volveu a superar os 300.000 habitantes...