Traballadores de residencias xeriátricas privadas e centros de día de Galicia manifestáronse este venres polas rúas do centro de Vigo para denunciar a “precariedade” no seu sector e para reclamar un convenio colectivo “digno”, nunha mobilización convocada por CIG, CC.OO. e UGT.

A marcha saíu da rúa Gran Vía, á altura da residencia Ballesol, para concluír fronte ás oficinas de DomusVi na rúa García Barbón, e ía encabezada por unha pancarta coa lema “Persoal esencial en loita por un convenio digno”.

A protesta deste venres é a antesala da folga indefinida á que está convocada o sector a partir das 22,00 horas do 17 de marzo. Un día antes, as traballadoras volverán saír á rúa, nesa ocasión en Santiago, para facer ouvir as súas demandas, cunha manifestación ás 11,00 horas desde San Caetano ata o Parlamento.

O colectivo, cuns 12.000 empregos en Galicia, denunciou as condicións nas que levan a cabo o seu labor, con falta de persoal e medios, e criticaron que a patronal “torpedeou” calquera intento de negociación.

Os sindicatos apuntaron que estas profesionais (na súa maioría mulleres) teñen salarios “miserables” e reclaman subas que se adecúen ao actual contexto socioeconómico; tamén reclaman medidas de conciliación familiar, melloras nas súas baixas ou en materia de seguridade laboral.

Tamén censuraron que a patronal está controlada por grandes grupos, que “fan caixa” á conta das persoas usuarias e de manter aos seus persoais en situación de precariedade, tendo moitas delas concerto coa Xunta, que “mira para outro lado”.

Finalmente, lembraron que este conflito “afecta a toda a sociedade galega”, porque está en xogo o coidado dos maiores, e porque se trata dun servizo esencial, cuxos traballadores viron empeorada a súa situación aínda máis por mor da pandemia.

Os tres sindicatos dirixiron un escrito á Valedora do Pobo para denunciar estes problemas, os cambios de xornada, as sobrecargas de traballo, e a negativa da patronal a negociar “un convenio colectivo digno”.