Os tres sobreviventes da ‘Villa de Pitanxo’, o pesqueiro galego naufragado o 15 de febreiro a 450 quilómetros ao leste de Terranova, declararon o pasado mércores en Vigo ante a Comisión de Investigación de Accidentes e Incidentes Marítimos (Ciaim), órgano dependente do Ministerio de Transportes que deberá emitir un informe sobre o sinistro no prazo máximo dun ano.
Esta comisión comezou coas súas pescudas tras o naufraxio –con nove falecidos e 12 desaparecidos– nunha primeira fase na que formou un equipo de investigadores e solicitou “evidencias documentais e electrónicas” sobre o buque, a súa tripulación e a súa viaxe. Para iso, recompilou: certificados do buque, proxecto de construción, reformas, listas de tripulantes, titulacións e certificados dos tripulantes, rexistros electrónicos dos sistemas de localización do buque (caixa azul de pesca e rexistros do Sistema de Identificación Automática), previsións meteorolóxicas, radiocomunicacións e sinais de emerxencia.
Agora, tal como confirmou o delegado do Goberno en Galicia, José Miñones, comezou unha segunda fase de investigación, que pasa por entrevistas á tripulación sobrevivente, que chegou a Santiago na madrugada do 21 ao 22 de febreiro nun voo procedente de Terranova. Miñones indicou que entre esta semana e a que vén tamén se tomará declaración aos familiares das vítimas, para coñecer a información que lles trasladaron a eles os mariñeiros que viaxaban na ‘Villa de Pitanxo’.
O grupo Nores, armadora da ‘Villa de Pitanxo’, informou hai uns días de que, “conforme ao trasladado polo patrón”, Juan Padín (un do tres sobreviventes do naufraxio), “o accidente produciuse durante a manobra de viraxe do aparello”. Con base neste relato, o pesqueiro foi a pique “de forma moi rápida” polos golpes de mar que o escoraron, despois de sufrir unha parada no motor principal durante unha manobra de virada do aparello.
SEN NOVIDADE SOBRE OS MEDIOS A ENVIAR
Por outra banda, cúmprese unha semana desde que o director xeral da Mariña Mercante, Benito Núñez Quintanilla, comprometese ás familias que o Goberno buscaría alternativas con empresas privadas para poder enviar un robot ao pecio, despois de que se descartase que o Executivo central vaia a mandar medios propios á zona na que naufragou o pesqueiro –a 450 quilómetros ao leste de Terranova–.
E é que é necesario un robot que poida descender a 1.000 metros de profundidade, onde se estima que está afundido o pesqueiro, así como medios técnicos que permitan traballar na zona coas complicacións por cuestións como a altura das ondas. Os familiares dos desaparecidos explicaban o 24 de febreiro que darían “un tempo prudencial” para estas xestións, pero unha semana despois lamentan que seguen sen novidades. Así, pediron unha nova reunión para coñecer como avanza esas opcións e esperan que se poida celebrar a próxima semana, tras non levar a cabo este xoves.
Please wait while you are redirected...or Click Here if you do not want to wait. ‘ sec=’3’]
