O portavoz do goberno municipal vigués, o socialista Carlos López Font, comparou este mércores o portavoz do grupo municipal do PP, Alfonso Marnotes, cun “xuíz dun Tribunal de Orde Pública do réxime fascista de Franco”, pola presentación dunha moción (que foi rexeitada no pleno) na que instaba o goberno local a rexeitar a petición de indulto do funcionario condenado por ‘enchufar’ a unha familiar de Carmela Silva, e pedía a dimisión da primeira tenente de alcalde e presidenta da Deputación.
Alfonso Marnotes defendeu a presentación desa moción, que alude a unha condena “por uns feitos moi graves” que, ao seu xuízo, incumben directamente a Silva e o propio alcalde, que “non deron ata agora ningunha explicación”. “Son uns feitos que nos enchen de vergoña, e o condenado argumenta para pedir o indulto a súa militancia de 40 anos no PSOE. Agora teñen a oportunidade de pronunciarse, de dicir se están a favor dese indulto”, proclamou o portavoz ‘popular’.
Marnotes instou o goberno municipal a “pedir perdón aos cidadáns” por estes feitos, por non terse personado na causa para defender os intereses do Concello e por mirar ” para outro lado”. “Isto é un indulto a vostedes mesmos, o condenado está a dicir na súa solicitude ‘son un de vós'”, denunciou, e preguntou se “será verdade” que se está “tentado solicitar apoios na cidade para apoiar ese indulto”.
En resposta á moción do PP, o portavoz do grupo socialista e do goberno local, Carlos López Font, comparou a Marnotes cun “xuíz dun Tribunal de Orde Pública do réxime fascista de Franco”. Font cuestionou “a autoridade moral” do PP para pedir explicacións sobre corrupción porque son “o partido da chantaxe e da espionaxe entre os seus”, “como está a ver agora toda España”, en alusión á crise dos ‘populares’ a nivel nacional.
Font remitiuse ás mesmas manifestacións realizadas no pleno extraordinario que se celebrou, a instancias da oposición, para pedir o rexeitamento á corrupción e mecanismos para evitar que volvan repetirse episodios como os que deron lugar a esta condena. “Vólvollo a repetir, teñen que respectar as sentenzas xudiciais, a honra recoñecida na Constitución, que a señora Silva non foi chamada a declarar nin forma parte desa sentenza”, insistiu.
“ALUCINADOS” POR ESTA MOCIÓN
Pola súa banda, o portavoz de Marea de Vigo, Rubén Pérez Correa, declarouse “alucinado” pola moción do PP, que é “o partido que máis indultos deu” en casos de corrupción. En todo caso, recalcou que o importante son as explicacións políticas, non pronunciarse sobre un indulto que aínda non se produciu, e insistiu na necesidade de que se adopten medidas para salvagardar a transparencia e a legalidade nos contratos municipais.
Mentres, o concelleiro do BNG, Xabier Pérez Igrexas, lembrou que, xa no pleno extraordinario do pasado xaneiro, expresou o seu rexeitamento ante este “grave caso de corrupción e enchufismo”, e tamén puxo en dúbida as intencións do PP con esta moción. Respecto diso, lembrou que o “historial” deste partido non lle dá “lexitimidade ética, política ou moral para abanderar unha batalla pola limpeza”.
