A asemblea de traballadores do grupo Nueva Pescanova ratificou nas últimas horas o preacordo pactado entre a empresa e a parte social para subir os salarios no novo convenio, que terá unha vixencia de catro anos.

Así, a CIG sinala que a “práctica totalidade” dos asistentes á asemblea, celebrada o domingo no centro sociocultural de Valadares, deu luz verde a ese preacordo, que “establece un incremento total dun 9 %” ao longo dos catro anos de vixencia do acordo. A partir de agora, cada centro de traballo do grupo multinacional deberá aprobar en asemblea os seus convenios colectivos.

O preacordo salarial foi alcanzado o pasado 24 de xaneiro despois de meses de negociación e supuxo a suspensión dos paros convocados para finais de xaneiro. En virtude do pactado, a empresa pagará un 2,5 % de atrasos por todo o ano 2021, máis o 2,5 % de incremento correspondente ao ano 2022. A maiores, Nueva Pescanova abonará unha paga única de 350 euros a todo o persoal, independentemente da súa xornada laboral.

Segundo a CIG, “a suba directa total para os catro anos supera o 9 %”, cun incremento do 2,5 % correspondente a 2021, unha suba do 2,5 % do ano 2022, unha do 2 % para 2023 e unha doutro 2 % en 2024. Se a suma dos aumentos entre 2022 e 2024 fose inferior á suma do IPC deses anos, pagarase o 75 % desa diferenza.

Os sindicatos destacaron que este preacordo foi froito da “unidade” do persoal nas súas demandas, e dos representantes dos traballadores nos diferentes comités de empresa do grupo.