O auditorio Mar de Vigo pechou o 2021 cun “gran balance de asistencia de público” a pesar das restricións da pandemia, contabilizando case 54.000 persoas que asistiron a algunha das representacións que alí se levaron a cabo.

Do total de persoas que pasaron polo Mar de Vigo o ano pasado, máis de 43.000 acudiron a algún dos espectáculos que acolleu o recinto, mentres que 10.900 pesonas foron de forma presencial a congresos, feiras ou actos celebrados neste espazo.

Por segundo ano consecutivo, o Festival TerraCeo converteuse no evento que recibiu un maior número de espectadores, con máis de 24.700 asistentes aos 54 concertos celebrados na terraza do Mar de Vigo, 10.000 máis que en 2020.

“O Mar de Vigo tamén completou un bo ano no apartado de congresos, feiras profesionais e actos de diversas entidades, polos que apsaron 10.900 persoas polas súas diferentes salas e o hall do edificio”, subliñaron desde a entidade.

Neste sentido, en rolda de prensa o alcalde de Vigo, Abel Caballero, destacou o “moi positivo” balance do auditorio da avenida de Beiramar, que “aguantou francamente ben” a pesar das restricións da pandemia.