O Tribunal Superior de Xustiza de Galicia (TSXG) instou á Xunta a implantar o servizo de gardas 24 horas nos partidos xudiciais da Coruña e Vigo, os únicos das súas características que carecen deste sistema de quenda rotatorio.
As xuntas sectoriais de xuíces de instrución da Coruña e Vigo aprobaron por unanimidade reclamar ao Goberno autonómico, a través do Alto Tribunal galego, a dotación deste servizo, que conta “co apoio unánime de todos os colectivos implicados na Administración de Xustiza”.
Nun comunicado, o TSXG traslada a demanda dos xuíces de instrución, que inciden en que existe unha partida nos Orzamentos Xerais do Estado para este ano 2022 destinada á implantación deste sistema nos xulgados dos partidos xudiciais das dúas grandes áreas urbanas galegas.
Un sistema que cualifican de “indispensable” para “superar as disfuncións do sistema actual e procurar a prestación dun servizo público áxil, moderno, eficaz e respectuoso coa tutela dos dereitos fundamentais e as garantías procesuais”.
O TSXG lembra que a súa Sala de Goberno presentou no ano 2019 a solicitude ante o Consello Xeral do Poder Xudicial (CGPJ) tras a proposta realizada polos xuíces de instrución, que consideran necesario cambiar as actuais gardas semanais por quendas rotarios diarios de 24.
A proposta foi admitida polo CGPJ que, con todo, resaltaba no seu informe que o cambio estaba supeditado a que Xunta e Ministerio de Xustiza asumisen o seu custo.
