O Concello de Vigo revisará os estanques artificiais do parque-paseo do barrio de Navia despois de que, nas últimas horas, colapsase o fondo dunha das balsas causando unha inundación e unha fervenza de auga na parte traseira da rúa Teixugueiras.

Así o trasladou nunha rolda de prensa o alcalde da cidade, Abel Caballero, quen explicou que o fondo dunha desas piscinas ornamentais veu abaixo, o que provocou a saída da auga. A zona foi valada e iniciaranse os traballos para revisar o estado de todos os estanques.

“Isto fíxoo a Xunta hai 15 anos, é unha chapuza. As balsas están sen cimentar, sobre a terra, e a terra cede e afúndese”, afirmou Abel Caballero, en alusión á urbanización desa zona, deseñada polo goberno galego bipartito e concluída, con atraso, cando Feijóo xa presidía a Xunta. De feito, o rexedor sinalou que o goberno local está “a refacer” unha parte da urbanización de Navia, e puxo como exemplo a próxima humanización da rúa Teixugueiras.

XUNTA DE GOBERNO

Por outra banda, na rolda de prensa deste xoves, o rexedor confirmou que a Xunta de Goberno Local deu luz verde ao proxecto de obras de acondicionamento da sede do antigo Instituto Municipal de Educación no Chouzo, preto da Praza da Industria, para a instalación dunha escola infantil. Abel Caballero lembrou que o orzamento que figura no proxecto é de 627.000 euros, aínda que os traballos aínda non foron licitados, e que se actuará sobre 650 metros cadrados de superficie para acondicionar espazos.