A Universidade de Vigo puxo en marcha este ano académico un título propio destinado a persoas con diversidade intelectual, baixo o ‘paraugas’ da Escola Aberta de Formación Permanente, e que conta con 12 estudantes que poderán aumentar as súas competencias e habilidade, así como gañar en autonomía.

O reitor da institución académica viguesa, Manuel Reigosa, deu a benvida este martes a esta ducia de estudantes, nun acto no que tamén participaron a vicerreitora de Responsabilidade Social, Internacionalización e Cooperación, Maribel Doval; a directora da Escola Aberta de Formación Permanente, María José Moure; e representantes da asociación Down Vigo.

“Estamos moi contentos de tervos aquí connosco, porque somos dos que pensamos que a Universidade ten que ser aberta, igualitaria, inclusiva e aspirar a unha sociedade máis xusta”, afirmou o reitor, que agradeceu o apoio da Fundación ONCE nesta iniciativa.

Pola súa banda, Maribel Doval explicou aos alumnos que, ao longo da súa formación, van aprender “ moitas cousas importantes para a vida e para conseguir un bo traballo”; mentres que José Manuel García, presidente de Down Vigo, cualificou este proxecto como un “fito moi importante”, xa que permitirá aos estudantes conseguir un título propio da UVigo.

O curso, que conta co apoio económico de Fundación ONCE e do Fondo Social Europeo, está destinado a persoas entre 18 e 29 anos con diversidade intelectual recoñecida igual ou superior ao 33 %, e inscritas no Sistema Nacional de Garantía Xuvenil.

Os alumnos terán 670 horas de docencia presencial e 50 horas de prácticas en empresas, co fin de aumentar a súa formación académica pero tamén as súas habilidades e capacidade para mellorar a súa inserción laboral. Esta formación interdisciplinar será impartida por profesores de Down Vigo e docentes da propia Universidade.

Entre as materias que forman parte do programa, están Economía, Finanzas, Organización de Empresas, Informática, Matemáticas ou Inglés.