O alcalde de Vigo, Abel Caballero, eludiu este martes pronunciarse sobre o resultado do proceso de primarias do PSdeG que, este pasado fin de semana, deu a vitoria a Valentín González Formoso, fronte ao actual secretario xeral e sobriño do rexedor olívico, Gonzalo Caballero.
Nunha rolda de prensa e preguntado polos medios de comunicación, o alcalde lembrou que non fala “de cuestións do partido”, aínda que matizou que está “orgulloso de ser do PSOE”. Así, Abel Caballero evitou facer valoracións sobre o proceso de primarias do PSdeG proclamando: “O meu partido é a miña cidade, é Vigo”.
Por outra banda, reiterou que o seu “ámbito de actuación” é a Executiva Federal do PSOE, da que é membro, e a presidencia da Federación Española de Municipios e Provincias (FEMP). “E con iso xa teño suficiente”, resolveu.
O alcalde de Vigo quixo manterse á marxe das primarias do seu partido en Galicia e, cando foron convocadas, avanzou que mantería a “neutralidade”. De feito, Abel Caballero non participou en ningún dos actos que Gonzalo Caballero e Valentín González Formoso levaron a cabo na cidade olívica.
En calquera caso, fontes da súa contorna confirmaron a intención do alcalde de votar ao seu sobriño Gonzalo nestas primarias. De feito, o ata agora secretario xeral do PSdeG só logrou situarse por diante do seu opoñente en dous das grandes cidades galegas, Vigo e Pontevedra.
