A Policía Local de Vigo iniciará unha campaña para evitar a circulación de patinetes eléctricos en espazos peonís e que levará a cabo ata o próximo 7 de novembro. En declaracións remitidas aos medios, o alcalde, Abel Caballero, explicou que, deste xeito, búscase sumarse á campaña realizada pola Dirección General de Tráfico (DGT) para previr a circulación destes vehículos de mobilidade persoal na beirarrúa. Así, incidiu na importancia de que “cumpran as normas de circulación” e lembrou que non poden transitar por beirarrúas e vías peonís, xa que deben limitarse aos carrís bici ou a calzada.

COLEXIOS PÚBLICOS

Por iso, avanzou que a Policía Local levará a cabo unha campaña de sensibilización e control sobre ciclistas e persoas que viaxen nestes vehículos ata o próximo 7 de novembro. Noutra orde de cousas, o rexedor asegurou que o Concello “inviste unha cantidade moi significativa” en colexios públicos de educación primaria situados na cidade e que cifrou en 7 millóns de euros anuais destinados a subministracións, limpeza, obras e tarefas de vixilancia.

Neste sentido, sinalou que este ano se destinaron 2 millóns de euros a traballos de renovación, mantemento e cubrimiento de espazos en colexios “a pesar de que o 70% destes gastos son competencia da Xunta”. Así, volveu a denunciar o “abandono” da Administración autonómica a estes centros, que contrapuxo coas 80 actuacións impulsadas polo goberno local en 40 deles.