As Anpas e entidades veciñais de Teis criticaron este xoves que o goberno local non lles facilita información concreta sobre a nova biblioteca que se anunciou para o barrio, no edificio do antigo ambulatorio, e que tampouco lles garante que será unha instalación cultural con fondos para préstamo e non unha simple sala de lectura.

Así o trasladaron nunha comparecencia ante os medios, na que lembraron que levan tempo demandando ao Concello “información e participación” en relación a este proxecto, e criticaron que antes do verán solicitaron reunirse con todos os grupos municipais para coñecer as súas propostas e opinións. “Todos os partidos políticos participaron, excepto o PSOE”, lamentaron.

Así mesmo, explicaron que, “tras a insistencia das organizacións do barrio”, conseguiron que o concelleiro de Cultura, Abel Losada, mantivese un encontro con dous representantes das Anpas. “Nesa reunión, o Concello non aclara algo básico para nós: que a biblioteca que se vai a inaugurar no barrio vai ter libros en préstamo e persoal bibliotecario, estándares mínimos para poder chamarse biblioteca”, lamentaron.

Segundo apuntaron, tras esa reunión o goberno local comprometeuse a fixar un novo encontro para setembro, para que representantes municipais acudisen ao barrio a explicar ás organizacións os trámites que se están realizando e escoitar as súas propostas.

Chegado o mes de outubro, denunciaron que o Concello non deu resposta ás “reiteradas peticións de reunión”, facendo un “desplante” á veciñanza de Teis. Finalmente, advertiron de que non atopan “por ningunha parte” a licitación do proxecto, cuxas obras “deberían empezar este ano”.