O BNG retomou este martes nas rúas de Vigo a súa campaña de recollida de firmas contra a “estafa” da subida do recibo da luz, para esixir medidas ao Goberno central e á Xunta, e para reclamar o establecemento dunha tarifa eléctrica galega.

A deputada nacionalista Carmela González sinalou que o BNG leva recollidas “máis de 23.000 firmas”, o que demostra “a indignación e o cabreo” dos galegos ante este “tarifazo eléctrico”.

Segundo incidiu, se antes de verán era “importante mostrar o rexeitamento”, “agora éo máis” porque o recibo eléctrico “non fixo máis que subir e bater marcas históricas” nas últimas semanas. Así, defendeu a mobilización para que se free esa escalada de prezos, “que prexudica ás familias, ás pemes e á industria, e só beneficia ás grandes eléctricas, que aumentan as súas ganancias de forma indecente“, e reclamou a “tarifa eléctrica galega”.

Pola súa banda, o concelleiro do BNG no Concello de Vigo, Xabier Pérez Igrexas, tamén criticou que os cidadáns teñan que soportar ese “atraco mensual” ante a “inacción” do Goberno central e da Xunta, e avogou por unha “intervención pública” que garanta que a poboación poida ter acceso á subministración eléctrica, “un ben esencial”.

Finalmente, lembrou que el mesmo presentou unha moción no Pleno municipal a finais de xuño para propor medidas respecto diso, e abaratar o prezo da luz, e que o PSOE votou en contra, coa “abstención cómplice” de PP e Marea de Vigo.