A Xunta de Galicia mantén o prazo de finalización das obras da nova estación de buses de Vigo, que non se viron afectadas pola crise global de prezos e subministración de materiais, e que estará terminada este ano.

Así o trasladou a conselleira de Infraestruturas e Mobilidade, Ethel Vázquez, que este venres visitou os traballos, xunto coa delegada territorial da Xunta, Marta Fernández-Tapias, e que lembrou que o goberno autonómico inviste nestes traballos, que se integran no complexo intermodal de Urzáiz, uns 18 millóns de euros, ademais da parte que cofinancia dos accesos.

A conselleira puxo en valor o “esforzo económico e administrativo” da Xunta neste complexo intermodal, tras darlle “viabilidade urbanística” cunha lei (a normativa 3/2016) que permitiu eludir as consecuencias de ter un Plan Xeral de Ordenación Municipal anulado polos tribunais.

Por outra banda, tamén destacou a “complexidade” dos traballos, que contempla accesos en dous niveis, e que obriga a “encaixar á perfección diferentes pezas”. Todo iso fai necesaria unha “coordinación” co resto de administracións que están a realizar intervencións nese complexo: a construción do centro Vialia (impulsada desde a administración central) ou o túnel de Lepanto e a remodelación da antiga Praza da Estación (que executa o Concello.

EVOLUCIÓN DA OBRA

A construción da nova estación de buses “avanza a bo ritmo”, segundo explicou Ethel Vázquez, xa que non se viu afectada pola crise global de prezos e subministración de materiais, e a obra atópase executada ao 65 %.

A día de hoxe, a escavación dos túneles de acceso está case terminada, así como o pilotado da dársena e outros elementos, e restan por colocar os alicerces para a marquesiña da cuberta, facer a reforma interior do edificio de viaxeiros ou a urbanización das dársenas.

A nova estación de buses de Vigo contará con 30 dársenas e prevé que a terminal faga 500 expedicións diarias, o que supón uns dous millóns de viaxeiros ao ano. O tempo de mobilidade dos usuarios cara á estación de tren será de “un ou dous minutos”.

Finalmente, a conselleira de Infraestruturas e Mobilidade lembrou que a Xunta pretende a cesión dos terreos onde se atopa a vella estación de buses, na Avenida de Madrid, para a construción dun “centro intergeneracional”. Por iso, expresou a súa esperanza de contar con “colaboración por parte do Concello” (cuxo goberno local xa descartou ese uso).