O recinto multiusos da Estacada, en Bueu (Pontevedra), acollerá este sábado a penúltima xornada de concertos do festival SonRías Baixas 2021, coa actuación de SonDaRúa e Kase.O Jazz Magnetism.

Segundo confirmou a organización, as entradas para ambos os concertos están esgotadas desde hai dous meses, e abrirá a quenda de actuacións SonDaRúa, ás 21,00 horas. Este grupo (Hugo Guezeta e Álex Arnoso nas voces, e That Bass como DJ), con gran proyeccción no panorama galego, combina a ironía e a tradición oral, facendo gala dun hip hop reivindicativo, de crítica social e política.

Ás 22,15 horas será a quenda de Kase.O, o coñecido rapero fundador do grupo Violadores del Verso e considerado un dos mellores MCs do rap en español. Este 2021 o músico celebra o décimo aniversario do seu proxecto en solitario, Jazz Magnetism.

O festival SonRías Baixas baixará o pano este domingo, cos concertos de Muerdo e La Pegatina.