O alcalde de Vigo, Abel Caballero, constatou este venres que o rexedor de Madrid, José Luís Martínez Almeida, está “encabuxado” porque a cidade olívica “lle gaña en luces de Nadal”, e convidou os madrileños a visitar Vigo nesas datas, dado que o seu alcalde “non vai ser capaz de facer o Nadal que merecen”.

Así o trasladou o primeiro edil socialista nunha rolda de prensa, na que quixo responder as críticas do seu homólogo madrileño, que censurou a Caballero por facer bromas cando “aos españois lles preocupa máis o recibo da luz” que a instalación da iluminación do Nadal.

O alcalde de Vigo afirmou que Martínez Almeida “saíu en contra das luces de Nadal” da cidade e atribuíu as críticas ao feito de que “está encabuxado” porque Vigo “lle gaña”. “Quérolle dicir a todos os madrileños, a todo Madrid que, como o seu alcalde non vai ser capaz de facer o Nadal que merecen, eu ofrézolles que veñan a Vigo e gocen”, proclamou.

Abel Caballero sinalou que, “ata agora, só había unha persoa á que non lles gustaba o Nadal de Vigo, que era Núñez Feijóo”, e lamentou que a el se sumase “o PP de Madrid”, ademais dos ‘populares’ de Vigo. Así mesmo, denunciou que “tamén o BNG de Vigo está en contra”, en alusión ás críticas realizadas polo concelleiro nacionalista Xabier Pérez Igrexas (quen lembrou que a instalación de luces led nas árbores está prohibida pola ordenanza municipal). “Se do BNG se tratase, Vigo estaría nas pallozas”, asegurou.

TARIFA ELÉCTRICA

Con respecto á denuncia feita polo alcalde de Madrid sobre o prezo da luz, Caballero admitiu que o recibo é “caro, carísimo”, pero incidiu en que a regulación da tarifa foi implantada polo Goberno de Mariano Rajoy “para enriquecer as eléctricas”. Por contra, defendeu que o Executivo de Pedro Sánchez non só suprimiu o IVE, senón que “está a elaborar unha nova tarificación”.