Un proxecto promovido polo CIFP Manuel Antonio (Vigo) para impulsar a innovación na fabricación de produtos derivados do millo autóctono galego ben de rematar o seu desenvolvemento. O seu obxectivo é recuperar o uso do millo autóctono para a fabricación de pans tradicionais de calidade.

A iniciativa contou con financiamento da Xunta e recibiu asesoramento do Consello Superior de Investigacións Científicas (CSIC), segundo detallou este último. Así, ‘Tradición e innovación dos produtos derivados do millo galego’ foi posta en marcha en 2019 e o seu desenvolvemento ampliouse ata este ano debido á situación derivada da pandemia.

Os obxectivos do proxecto incluían a promoción do uso do millo autóctono para recuperar a fabricación de produtos de panadaría tradicionais e de calidade, así como a realización de propostas didácticas para o alumnado. Tamén se aspiraba a explorar novas fórmulas de fabricación de produtos derivados do millo tradicional.

Deste xeito, o CSIC asesorou ao alumnado e o profesorado respecto das variedades autóctonas do millo para a panificación e facilitou o procedente das súas plantacións experimentais en Pontevedra. Así, ofreceu formación sobre a elaboración e a comercialización deste tipo de produtos.

No marco desta iniciativa tamén se instalou un forno tradicional de pedra no CIFP Manuel Antonio e desenvolveuse unha aplicación móbil para ofrecer información do produto, ademais de establecerse un punto de venda no centro e deseñarse unha campaña de mercadotecnia e publicidade dirixida a novos consumidores.