O xulgado de instrución 6 de Vigo decretou a posta en liberdade de I.M.R., un mozo de 25 anos de idade que foi detido o pasado fin de semana pola Policía Local da cidade durante o desaloxo dun ‘botellón’ multitudinario. O mozo ten a condición de investigado polos supostos delitos de resistencia e desobediencia.
A detención produciuse na madrugada deste pasado domingo, pasadas as 3,00 horas, cando axentes do 092 acudiron á Praza da Estrela, onde estaba a ter lugar un ‘botellón’ no que participaban unhas 200 persoas, sen manter a distancia social e, moitas delas, sen usar máscara.
Os axentes dispersaron á multitude, que foi abandonando a praza sen incidencias, salvo un grupo de cinco persoas, que se negaron, polo que a Policía procedeu a identificalos.
Unha desas persoas, un mozo de 25 anos de idade, I.M.R., de nacionalidade uruguaia e veciño da cidade, negouse a mostrar a súa documentación e enfrontouse aos funcionarios, segundo detallaron fontes policiais, chegando mesmo a “golpear na cara” a un dos axentes. Por estes feitos foi detido e posto a disposición xudicial este domingo.
