A Universidade de Vigo dá un paso máis na súa aposta polo progreso tecnolóxico cun plan especial chamado a sentar precedente. Unha vintena de estudantes dos campus de Ourense e a cidade olívica veñen de poñer en marcha UVigo SpaceLab, que dende a institución definen como “un equipo multidisciplinar” cuxo obxectivo non será outro que mandar un satélite ao espacio.

O proxecto, recollido baixo o nome BIXO (Bacteriological Intercommunication eXperiment) ten un horizonte temporal de tres anos para proceder ao deseño, fabricación e operación destes pequenos satélites que serían dispostos cun obxectivo claro: enviar microorganismos ao espazo para estudar como lles afecta a exposición prolonga a ese entorno máis alá da nosa atmosfera.

Segundo explican dende a Univeridade, o UVigo SpaceLab está a procurar novos membros a través dunha convocatorio dispoñible para todo o alumnado da universidade, que se poderá inscribir ata o 27 de maio.  O proxecto BIXO, engaden, ten a finalidade de “entender como afecta a exposición prolongada ao ambiente espacial, tanto nos humanos como nos organismos que viaxan con eles”.

Para cumprir este obxectivo, enviaranse cultivos bacterianos ao espazo a través de tarxetas de milifluídica nun CubeSat, un satélite de pequenas dimensións. A análise dos datos das mostras comezará cando este nanosatélite estea en órbita e, grazas aos seus sensores, terá en consideración distintos parámetros do comportamento dos microorganismos, como o seu crecemento ou a posible comunicación intercelular bacteriana.

A importancia dos procesos examinados é “máxima”, apuntan, xa que poden influír na saúde e seguridade das astronautas. No caso dos patóxenos é evidente, pois tanto o seu desenvolvemento como a comunicación intercelular poden xerar resistencia aos antibióticos, crear biofilms ou mesmo orixinar factores virulentos.