O presidente da Autoridade Portuaria de Vigo, Jesús Vázquez Almuíña, advertiu este venres de que a construción dun túnel na Avenida de Beiramar, como reclama o goberno local encabezado por Abel Caballero, complicaría os tráficos de acceso e saída á terminal e iría “contra a actividade de moitas empresas”.
Vázquez Almuíña lembrou que esa avenida está en terreo portuario e que a planificación urbanística do organismo non contempla esa obra de soterramento do tráfico.
Respecto diso, sinalou que “habería que facer un estudo moi sólido para saber como se resolverían os tráficos” e “a infografía” que mostra o alcalde sobre como quedaría a transformación “non expón nada diso”.
Vázquez Almuíña incidiu na importancia das empresas e sectores que operan no porto, que fan os seus transportes, tanto de pesca como de, por exemplo, pezas de gran tamaño, por ese viario. “E todo isto habería que casalo cun túnel que debería permitir unhas mobilidades moi complicadas“, engadiu.
Segundo o presidente do porto, o túnel “como idea, vai contra a actividade de moitas empresas” e “xa houbo informes desfavorables”. Ademais, apostilou, “calquera proxecto como este, que afecta a unha actividade sensible, ten que falarse co sector” e, tal e como asegurou, este sector xa transmitiu que o soterramento do tráfico “é incompatible” coa súa actividade.
“O túnel de Beiramar non é unha prioridade do Porto e pode supor un golpe mortal a esta actividade”, sentenciou Vázquez Almuíña.
