InicioPolíticaAbel Caballero retira a Espinosa as atribucións de Persoal en pleno conflito...

Abel Caballero retira a Espinosa as atribucións de Persoal en pleno conflito co comité de persoal

O comité de persoal en pleno chegou a pedir o cesamento de Espinosa, e denunciou que "non só é nefasta a xestión en materia de Persoal" senón que "non se cumpre a legalidade".

PUBLICADO O

A concelleira socialista Elena Espinosa deixará as súas responsabilidades na área de Persoal do Concello de Vigo, segundo anunciou este venres o alcalde, Abel Caballero, e faino en pleno conflito co comité de persoal e cando xa se acumularon varias sentenzas que cuestionan a actuación municipal neste ámbito (aínda que non todas se derivan da xestión de Espinosa).

O rexedor olívico confirmou en rolda de prensa a súa decisión de “reformar” a concellaría que lidera Elena Espinosa e que, ata agora, levaba Empresa, Economía, Seguridade e Organización Municipal. Así, a partir deste momento a concelleira socialista centrarase nas áreas de Economía e Empresa, porque o Concello ten que “redobrar a súa atención” a estes ámbitos, debido a que optará a fondos europeos de recuperación económica Next Generation, mentres que a edila Patricia Rodríguez Calviño asumirá a área de Persoal (que suma á súa responsabilidade en Patrimonio e Xestión Municipal).

No entanto, e a pesar das explicacións de Caballero, o certo é que a xestión de Elena Espinosa á fronte de Organización Municipal suscitou duras críticas por parte dos representantes dos traballadores que, por primeira vez, uníronse (o seis sindicatos distintos) para denunciar o “caos” das políticas de recursos humanos e o “desmantelamento dos servizos públicos”.

De feito, o comité en pleno chegou a pedir o cesamento de Espinosa, e denunciou que “non só é nefasta a xestión en materia de Persoal” senón que, “o máis grave”, é que “non se cumpre a legalidade”.

Así, desde hai meses o Concello está a acumular na súa contra resolucións xudiciais que cuestionan medidas como o decreto que suspendía os descansos dos bombeiros (anulado por sentenza), o decreto de servizo mínimos pola folga neste servizo (tamén anulado), o nomeamento de xefes de servizo e altos funcionarios sen respectar os principios de mérito e capacidade, o pago incorrecto das horas extras, etc. (aínda que non todas as sentenzas refírense a conflitos suscitados durante o exercicio de Elena Espinosa).

Desde que Abel Caballero é alcalde de Vigo (2007), ostentaron a responsabilidade de dirixir a área de Persoal do Concello tres concelleiros socialistas: Carlos López Font, Francisco Javier Pardo e Elena Espinosa.

EXPLICACIÓN DE ABEL CABALLERO

O alcalde xustificou esta reorganización do seu goberno alegando a necesidade de concentrar esforzos na área económica e nos proxectos que optarán a fondos europeos. “Téñoa que liberar de Persoal (a Espinosa)”, aseverou.

De feito, preguntado polos medios acerca de se o nomeamento dunha nova concelleira de Persoal contribuirá a normalizar as relacións co comité, o alcalde proclamou que “o importante” do cambio é a atención aos proxectos europeos. “Iso é do que eu quero falar. A Xunta tenta interferir para que Vigo non teña proxectos, e voulle a rebentar esa iniciativa. E Elena xogará un papel fundamental nesa dimensión”, sentenciou.

Abel Caballero reiterou que, dado que Núñez Feijóo “non está presente na cidade”, el mesmo está a asumir o labor de “presidente da Xunta na área de Economía” en Vigo. “Feijóo abandonou á cidade. Non sabemos del hai meses”, denunciou, e puxo como exemplo as iniciativas que, como presidente da Zona Franca, está a liderar para obter fondos da UE, como a planta de baterías, a planta de fotóns ou a de hidróxeno verde.

ÚLTIMAS

Asistidas un pai e a súa filla en Vigo tras producirse un incendio na súa vivenda

Dúas persoas, un pai e unha filla, necesitaron asistencia en Vigo este xoves tras producirse...

Emilio Sotelino ou a Asociación de Viúvas Demócratas entre os Vigueses Distinguidos 2024

O pleno de Vigo aprobou este luns por unanimidade nunha sesión extraordinaria os novos Vigueses...

O goberno de Vigo aproba o marco orzamentario ata 2027 e prevé investimentos por valor de 33 millóns cada ano

O alcalde de Vigo, Abel Caballero, anunciou que o goberno local aprobou o marco...

Pechados parques e espazos arbóreos da cidade de Vigo debido ao temporal

O Concello de Vigo restrinxiu por seguridade o acceso aos parques e espazos arbóreos...