A Xunta de Galicia confirmou o inicio das obras de ampliación do Instituto Feiral de Vigo (Ifevi) para finais deste mes de abril, despois de asinar este xoves o contrato dos traballos. A ampliación do recinto feiral permitirá gañar 5.000 metros cadrados e o investimento previsto é de 6,7 millóns de euros. As obras foron adxudicadas á UTE Obrascón Huarte Lain-Construcións Taboada e Ramos, e teñen un prazo de execución de seis meses.

O goberno galego trasladou que esta obra pon de manifesto o seu “compromiso” coa cidade olívica e coa competitividade do Ifevi, xa que a ampliación, explican, permitirá consolidar a celebración de eventos de referencia, como as feiras Conxemar ou Navalia. Este proxecto foi tramitado ao amparo da lei 3/2016 de medidas excepcionais, para sortear as consecuencias que tivo na planificación urbanística a anulación da PXOM de Vigo a finais de 2015.