O Servizo Galego de Saúde (Sergas) detectou este fin de semana un brote de coronavirus que afecta a 12 pacientes ingresados na área de Xeriatría do Hospital Meixoeiro, en Vigo. Así o confirmaron a Europa Press fontes da área Sanitaria, que indican que tanto estas persoas como outras 10 que deron negativo nas probas xa foron derivadas ao Hospital Álvaro Cunqueiro, xa que o Meixoeiro está declarado como centro libre de covid.

Estas mesmas fontes explicaron que o brote se detectou despois de que un paciente, que recibira a alta, regresase ás poucas horas ao hospital porque se atopaba mal e presentaba síntomas compatibles coa enfermidade. Tras practicarlle a preceptiva proba PCR, deu positivo.

Deste xeito, iniciouse un cribado na planta de Xeriatría que permitiu desvelar os outros 11 contaxiados entre os pacientes. Os profesionais sanitarios investigan a orixe do brote, segundo concretaron as mesmas fontes da área Sanitaria. A ducia de persoas que deron positivo atópanse na área de covid do Hospital Álvaro Cunqueiro, mentres que os 10 cunha PCR negativa están na coñecida como ‘zona precovid’ por precaución e para observar a súa evolución nos próximos días.