O Concello de Vigo ultima os detalles dun proxecto de mobilidade a través de ramplas mecánicas, co que optará a financiamento dos fondos europeos de reconstrución (Next Generation EU), aínda que “non será o único”.

Así o confirmou o alcalde da cidade, Abel Caballero, nunha rolda de prensa na que explicou que pedirá fondos, a través do Goberno de España, para financiar a instalación dunha rampla mecánica entre Isaac Peral e a Travesía de Vigo, outras entre Travesía de Vigo e Aragón (entre estas dúas rúas os orzamentos municipais xa recollen a instalación dun ascensor), e entre o centro de saúde de Teis e a Avenida de Galicia.

Caballero, que non quixo desvelar o investimento nestas actuacións, recalcou que o goberno municipal prepara “máis proxectos” cos que optar a eses fondos de reconstrución. Así mesmo, apuntou que é “altamente probable” que tamén inclúa os tramos que faltan para completar a instalación de ramplas na Gran Vía.

Respecto diso, o alcalde sinalou que se presentarán os proxectos ante o Goberno de España, que é o que “xestionará” os fondos europeos para a reconstrución económica, e engadiu que “o que di a Xunta” sobre plans para reactivar sectores como a automoción “é mentira, unha falacia”, porque o goberno galego non dispón deses fondos.