O alcalde de Vigo, Abel Caballero, puxo data para a conexión por alta velocidade ferroviaria entre a cidade olívica e Lisboa, e subliñou que o Concello “aposta” polo ano 2030.
Caballero lembrou que xa trasladou ao Goberno portugués, a través do ministro de Infraestruturas luso, Pedro Nuno de Oliveira, o apoio de Vigo e do Goberno de Pedro Sánchez a esa conexión, que será posible grazas á saída sur ferroviaria en túnel desde a terminal de Urzáiz.
“O Goberno de España tamén considera que a saída sur é unha prioridade”, proclamou, e engadiu que “o Concello aposta porque en 2030 estea todo o corredor de alta velocidade entre Vigo e Lisboa”. “Xa sabemos que o Goberno de España o avala, porque o falei co ministro Ábalos”, incidiu Caballero.
O alcalde lembrou que o Executivo portugués recorrerá ao financiamento europeo para estender o trazado de AVE desde Lisboa ata a fronteira co sur de Galicia, e apuntou que “o Goberno de España verá como encadra o financiamento” do tramo no seu territorio.
Abel Caballero subliñou que esta disposición, tanto de España como de Portugal, é “moi importante” para Vigo, porque a cidade se converterá “nun centro de confluencia da alta velocidade no Corredor Atlántico” e, ademais, a través de Vigo, o AVE conectará con Madrid “e Europa”.
Segundo o rexedor, esta rede ferroviaria “terá un reforzo de frecuencias como ningunha outra liña en Galicia”, e lembrou que o eixo Porto-Vigo-Ourense cobre unha poboación duns 5 millóns de persoas.
“Esta é a realidade que algúns non queren ver, e cando digo algúns me refiro ao presidente da Xunta”, subliñou Caballero, quen volveu a insistir en que os vigueses non viaxarán en AVE a Madrid “por Santiago”, porque “Vigo ten o tamaño para ter o seu tren de alta velocidade sen ter que dar unha volta de 100 quilómetros”.
