A Dirección Xeral da Sustentabilidade da Costa e o Mar, dependente do Ministerio para a Transición Ecolóxica, deu luz verde ao proxecto de ampliación da explanada anexa ao porto pesqueiro de Vigo, o que permitirá gañar 8.300 metros cadrados á beira da lonxa.

Segundo comunicou a Autoridade Portuaria de Vigo, a obra foi adxudicada por case tres millóns de euros, e o período de execución é de 12 meses. O Porto de Vigo lembrou que a actual situación de pandemia obriga a tomar medidas para garantir a seguridade sanitaria do peixe e marisco, o que implica unha ampliación e adecuación das instalacións da lonxa. Así, defendeu o organismo, mellorarase a operativa de carga e descarga por vía terrestre.

A ampliación concretarase coa construción dun peirao con bloques prefabricados, o que obrigará a facer un dragado que permita a obra e o aumento de calado ata os 8,5 metros nalgunhas zonas, que se dedicarán a atracada. Esta actuación é o paso previo para acometer a ampliación da lonxa, “á vista das necesidades de espazo que existen actualmente, como consecuencia das restricións establecidas pola crise sanitaria“, explicou o Porto.

OUTRAS ACTUACIÓNS

Por outra banda, a Autoridade Portuaria de Vigo lembrou que prevé investir 8 millóns de euros nos próximos meses en diversas actuacións de mellora e modernización da lonxa pesqueira. Así, xa se instalou unha marquesiña e mellorouse a instalación de frío da lonxa; e estanse executando obras como a ampliación do departamento de usuarios (adxudicada por case un millón de euros), coa construción dunha zona acristalada en altura, con vistas á sala de poxas.

Tamén se adxudicou a mellora do peirao do porto pesqueiro, no que se acometerán traballos de limpeza, estabilización e reforzo do paramento do peirao mergullado. Finalmente, adxudicouse por máis de 2,6 millóns de euros a mellora da eficiencia enerxética da lonxa, para que funcione con enerxías renovables. Así mesmo, está a estudarse a instalación de sistemas de xeotermia na zona do Mercado.