O alcalde de Vigo, Abel Caballero, volveu a arremeter este xoves contra o presidente da Xunta, Alberto Núñez Feijóo, en relación á fusión das caixas de aforro galegas, e tachou de “mentira absoluta e vil” a afirmación do mandatario galego de que as entidades estaban crebadas cando chegou ao goberno da Xunta, en 2009.

Nunha rolda de prensa, o rexedor olívico acusou a Feijóo de mentir “” no Parlamento e lembrou que a Audiencia Nacional xa constatou que “a situación complicada era a de Caixa Galicia, e que sen a fusión, Caixanova nunca sería intervida”. “Con todo, o ínclito presidente insistiu en que as caixas estaban crebadas cando el chegou. Está a chamar mentireiro ao xuíz? Non será vostede o que mente e engana?”, preguntou Caballero.

O alcalde de Vigo reiterou que Feijóo “usou a Caixanova e a Vigo para tapar o buraco e a caída dramática de Caixa Galicia e da Coruña”, e lembrou que a caixa viguesa apostaba por un SIP (Sistema Institucional de Protección), e que nin o Goberno central nin o Banco de España querían a fusión, pero o presidente galego impúxoa “sen que se saiba en base a que”, e “acabou en quebra”.

Por outra banda, na rolda de prensa o rexedor tamén se referiu ao AVE e á posta en marcha do tramo Zamora-Pedralba, que acurta a viaxe entre Galicia e Madrid.

Respecto diso, insistiu en que Vigo segue demandando o AVE directo á capital de España, que o PP “de Rajoy e Feijóo” parou, e que retomou o Goberno de Pedro Sánchez, coa realización do estudo hidrogeológico da variante de Cerdedo. “Non admitiremos nunca que nos leven por Santiago, non vou quedar calado“, proclamou Abel Caballero, quen denunciou a “humillación” dos viaxeiros vigueses que, na estación de Santiago, teñen que cambiarse de tren para tomar o convoi que vén desde A Coruña e seguir para Madrid.