O Concello de Vigo convocará un concurso de ideas para deseñar o ascensor e a pasarela que comunicarán García Barbón e Vía Norte, conectando tamén co complexo intermodal da estación de Urzáiz, segundo avanzou este luns o alcalde, Abel Caballero.

O rexedor sinalou que se abrirá un prazo de 5 meses para a presentación de candidaturas no concurso de ideas (dotado con medio millón de euros), e premiarase ao tres mellores deseños.

A proposta gañadora contará con outros 5 meses para redactar o proxecto e, tras a licitación, abrirase un prazo de 12 meses para a execución das obras, cun investimento estimado de 6 millóns de euros. En todo caso, o ascensor non estará rematado para cando se inaugure a estación, segundo recoñeceu o alcalde.

“Este ascensor vai marcar un novo Vigo, vai unir dúas zonas con máis de 20.000 habitantes cada unha”, proclamou Abel Caballero, quen expresou o seu desexo de que se presenten, ao concurso de ideas, “firmas de arquitectos moi importantes en España e no mundo”.

Con respecto á previsión inicial do que foi Premio Pritzker, Thom Mayne, o encargado de deseñar ese ascensor (o mesmo autor do deseño da estación do AVE), Abel Caballero sinalou que os servizos técnicos do Concello expresaron as súas dúbidas “xurídicas” de que se puidese adxudicar o traballo directamente a ese estudo.