A Xunta prorrogou o plan de transporte metropolitano da área de Vigo ata finais de 2021, o que supón un investimento de 1,5 millóns de euros, dos cales a maior parte irá financiar os descontos do 80% que se aplican en billetes interurbanos, a gratuidade dos transbordos e as bonificacións adicionais para usuarios frecuentes e familias numerosas.

A reunión do Executivo autonómico celebrada este xoves deu luz verde á ampliación do convenio do plan para os doce concellos que conforman a área metropolitana, segundo expuxo en rolda de prensa posterior ao Consello o titular da Xunta, Alberto Núñez Feijóo.

O plan rexistrou o pasado ano “máis de 3,25 millóns de viaxes” na comarca entre desprazamentos en barco (o 32%) e autobús (68%), segundo as cifras ofrecidas polo departamento de Infraestruturas e Mobilidade, que asume o 15% de desconto que se aplica para usuarios frecuentes e a rebaixa para familias numerosas, que oscila entre o 20 e o 50% do custo da pasaxe.

Ademais, máis de 16.000 mozos da área de Vigo dispoñen xa do cartón ‘Xente Nova’, unha iniciativa posta en marcha en 2016 para fomentar o uso do transporte público entre os menores de 21 anos, que viaxan gratis con este bono.