Máis dun centenar de persoas de distintos sindicatos e profesores concentráronse ante a Delegación Territorial da Xunta con pancartas nas que se podían ler mensaxes como ‘#escolacontracovid‘.

Durante unha media hora, os asistentes repetiron consignas como ‘Feijóo, escoita, o ensino está en loita’, ‘Ensino presencial e con seguridade’ e ‘Román Rodríguez, máis recursos e menos cocientes’ Na protesta demandaron “máis persoal e menos cociente” no regreso ás aulas, coincidindo cunha xornada de folga para a que a Xunta decretou uns servizos mínimos que ven “unha aberración”.

En declaracións aos xornalistas na protesta de Santiago, o portavoz da CIG, Suso Bermello, reivindicou a “dignidade” dos docentes e a súa intención de “protexer” aos alumnos, motivo polo que, segundo subliñou, “non están dispostos a ser cómplices da irresponsabilidade” que atribúe ao Goberno galego nesta volta ao colexio.

Mentres, por parte de CC.OO., Luz López coincidiu en que os servizos mínimos “impiden participar” na folga e incidiu en que é preciso “máis persoal”, tamén no relativo aos labores de limpeza dos centros. Sobre os grupos de convivencia estable, asegurou que son “un engano”, pois esta idea “rompe ao saír do colexio” e entrar en contacto os nenos con outras persoas. Tamén Bermello criticou que é “un concepto inventado”.