A pouco máis dunha semana para as eleccións autonómicas, a Xunta adxudicou a redacción do proxecto de urbanización que permitirá ampliar o chan residencial do barrio de San Paio de Navia e construír unhas 1.600 vivendas protexidas e volveu a urxir ao Concello a aprobación definitiva do plan parcial da zona.
Así o apuntou a conselleira de Medio Ambiente, Territorio e Vivenda, Anxos Vázquez, este venres nunha rolda de prensa celebrada na cidade olívica, onde detallou que o importe da adxudicación dos traballos á empresa Proyfe ascendeu a máis de 211.155 euros e que o seu prazo de execución estimouse en seis meses.
Segundo informou a titular, a amplicación da zona residencial abranguerá un total de 265.000 metros cadrados, nos que se construirán unhas 1.600 vivendas protexidas, e a dotación de máis de 489.200 metros cadrados de zonas verdes, urbanizados en 2011. Para acadar estes obxectivos, procedeuse á adquisición, en fases anteriores do proceso, de 80.000 metros cadrados, aos que se sumaron outros 50.000 en 2016 mediante un investimento de 10 millóns de euros.
UN PLAN PARCIAL “NO CAIXÓN”
O director do Instituto Galego de Vivenda e Solo (IGVS), Heriberto García, criticou que a actuación tivera que demorarse “máis de seis meses” esperando pola aprobación do plan parcial por parte de Concello de Vigo, unha crítica que compartiu a delegada territorial da Xunta na cidade olíviva, Marta Igrexas. A titular reprobou que o plan parcial de Navia “siga metido nun caixón da Alcaldía” e puxo en valor que o Goberno galego “siga adiante” co proxecto “fronte aos que se cruzan de brazos”, en alusión ao goberno local.
