Malestar entre as asociacións de veciños de Vigo por un Plan Xeral de Ordenación Municipal (PXOM) desenvolto “ás costas dos movemento veciñal” e “con nocturnidade”. A Federación de Asociacións de Veciños ‘Eduardo Chao’ (FAVEC), que representa un total de 32 plataformas da cidade, denuncia que o borrador do plan foi publicado “en plena corentena”, cando, debido ó estado de alarma, os colectivos veciñais non tiñan capacidade para reunirse e estudalo. Dende a federación lamentan que o consistorio de Abel Caballero nin sequera “informara” ós colectivos: “é coma se non existísemos”, apuntan.

Ante esta situación, o secretario da FAVEC, Óscar Álvarez, anunciou que desenvolverán unha rolda de encontros coas asociacións veciñais da cidade para explicar e debater un borrador que xerou “todas as dúbidas” nos colectivos veciñais. As charlas, que contarán con asesores urbanísticos e xurídicos, comezarán o 2 de xullo na AA.VV. de Freixeiro. A elas foron convidados todos os grupos políticos da cidadade, entre os cales tan só confirmaron asistencia Alfonso Marnotes (PP) e Rubén Pérez (Marea de Vigo).