O alcalde de Vigo, Abel Caballero, garantiu a cobertura dos servizos mínimos de bombeiros e a “seguridade” na cidade despois de que o comité de folga do servizo volvese denunciar as condicións de “escravitude” nas que traballan os efectivos por falta de persoal.
Preguntado tras comparecer en rolda de prensa na urbe olívica, o rexedor asegurou que estes profesionais “operan con garantías” e afirmou que se garante “a seguridade na cidade segundo a normativa”, que establece que se debe dispor de, polo menos, 16 profesionais en todo momento.
Estas manifestacións contrastan coas denuncias realizadas polos bombeiros este martes, cando criticaron que “hai 12 días” se lles comunicou que se reuniría unha mesa de negociación e que se lles trasladaría un documento-proposta sen que se avanzase en ningún destes sentidos, ante o que o rexedor explicou que se adoptarán as medidas oportunas “cando chegue o momento” e volveu insistir en que “está garantido todo” en relación á normativa do servizo.
Pola súa banda, portavoces do comité de folga lembraron que, neste momento, traballan pouco máis de 100 dos 120 efectivos do servizo, así como que Vigo necesitaría un persoal mínimo de 150 debido á súa poboación. Deste xeito, lamentaron que, tras “ano e medio de conflito”, 10 meses en folga e dúas sentenzas xudiciais que deron a razón ao colectivo, “ninguén” no goberno local sentase cos bombeiros para abordar a situación.
Os bombeiros insistiron en que non se cumpren os servizos mínimos e puxeron como exemplo o ocorrido este fin de semana no parque de Teis, onde, nese momento, se contaron catro efectivos, e este luns, cando o parque de Balaídos dispuña de dous bombeiros, un condutor e un mando. Tamén lembraron que, a finais de maio, se produciu unha situación similar cando se declarou un incendio nun garaxe da rúa Sanjurjo Badía.
Ante esta situación, denunciaron a “escravitude” dos bombeiros e afirmaron que a imposición de medidas como as gardas localizables provocan “ansiedade” aos traballadores e “falta de seguridade e garantías” no seu servizo.
