Unha muller foi detida en relación co incendio declarado pouco antes das 7,00 horas deste xoves nunha bufarda; un lume que obrigou a desaloxar ao resto de veciños do edificio “por precaución”.

Así o comunicaron fontes da Policía Nacional, que informaron de que o caso está en fase de investigación e a detida atópase “ingresada e pendente de valoración psiquiátrica”.

Os feitos ocorreron á primeira hora da mañá deste xoves na rúa Elduayen, concretamente no número 26. Até alí desprazáronse dotacións dos parques de Bombeiros de Balaídos e de Teis.

En concreto, as chamas producíronse nunha bufarda antiga, na que os veciños depositan diversos aveños e mobles. “Por precaución”, todos os veciños foron desaloxados e non puideron regresar as súas vivendas durante unhas dúas horas.