O alcalde de Vigo, Abel Caballero, participou este xoves nunha reunión do consello asesor de desescalada municipal para analizar a situación actual en relación á pandemia e poder comezar a planificar as actuacións que levarán a cabo na tempada estival.

En declaracións remitidas aos medios, o rexedor olívico valorou a reunión do consello, que este xoves sumou dous novos membros, dous médicos internistas dos hospitais Povisa e Álvaro Cunqueiro.

Ademais, sinalou que, no marco da reunión, os 20 expertos que asesoran o goberno local volveron a remarcar a necesidade de que a poboación manteña a utilización de máscaras durante o verán. Así, incidiron en que todas as persoas que dispoñan deste material de protección deben usalo “como un xesto” cara aos demais.

O alcalde tamén recomendou á poboación que comprobe a protección que ofrecen as máscaras adquiridas dado que, segundo apuntou, existen distintos tipos, como as FFP2, as hixiénicas e as cirúrxicas. Deste xeito, indicou que as entregadas polo Concello e o Goberno corresponden ás últimas e remarcou que ofrecen protección para as persoas que se relacionan coas que as utilizan.

Abel Caballero afirmou que os profesionais tamén recalcaron a importancia de intensificar as medidas de hixiene, así como de manter a distancia social. Neste sentido, lembrou que se deben evitar as aglomeracións en espazos pechados e abertos.

Adicionalmente, o alcalde indicou que o consello asesor analizou os resultados do estudo de seroprevalencia, que mostrou que menos do 3 por cento dos galegos padeceu a COVID-19.

A ese respecto, Abel Caballero subliñou que os expertos achacaron esta situación a que a incidencia da patoloxía era baixa na comunidade no momento no que se decretou o confinamento. Tamén concretou que explicaron que a maior parte dos casos detectados en Galicia tiveron a súa orixe fóra dela.