O operativo levado a cabo este domingo pola unidade Greco Galicia da Policía Nacional e o Servizo de Vixilancia Aduaneira, no que se interviñeron 4.000 quilos de cocaína a bordo dun buque mercante en alto mar, saldouse cun total de 27 persoas detidas.
Destas, doce foron apresados en terra firme, en Galicia, mentres que as outras 15 –14 de nacionalidades africanas e un galego– formaban a tripulación do barco, con bandeira de Togo.
A maior parte das detencións tiveron lugar en municipios da comarca pontevedresa do Salnés. As Forzas de Seguridade realizaron numerosos rexistros en Sanxenxo, O Grove, Vilanova de Arousa, Cambados e Vilagarcía de Arousa.
En dous destes rexistros, os axentes incautáronse de dúas planadoras, unha delas nun taller de coches en Sanxenxo e outra nunha parcela preto do mar en Porto Meloxo (O Grove). Ambas podían estar listas para ser utilizadas no desembarco da droga na costa galega.
Fontes da investigación consideran que con esta operación, coordinada desde o Xulgado Número 3 de Vigo, quedou desarticulada unha importante rede que contaba con toda a infraestrutura necesaria para o tráfico de drogas desde América ata a península, utilizando as Rías Baixas como punto de entrada.
UN DAS CABEZAS, FUXIDO
As mesmas fontes sitúan á fronte desta organización a J.C.S.N, de 40 anos e veciño de Vilanova, que conseguiu fuxir antes de que as forzas de seguridade procedesen á súa detención, e a B.V., tamén veciño de Vilanova, que si puido ser detido. Ambos contan con numerosos antecedentes relacionados co tráfico de estupefacientes a gran escala.
Prevese que o barco mercante, no que foron interceptadas as catro toneladas de cocaína, chegue este martes ao porto de Vigo, onde será descargada a droga. Ademais, durante a mesma xornada, está previsto que os detidos comecen a pasar a disposición xudicial, segundo informou a subdelegada do Goberno en Pontevedra, Maica Larriba.
Ata ese momento, sete das doce persoas detidas en terra permanecerán nos calabozos da Comisaría de Policía de Vigo e outros cinco, na de Pontevedra.
