Un curso de formación en Mercadotecnia Dixital Internacional impulsado polo Consorcio da Zona Franca de Vigo impartirase desde este mércores en tres edicións ante a demanda rexistrada.
En principio, ofertáronse 25 prazas para empresas interesadas en participar neste seminario en liña, segundo precisou a Zona Franca nun comunicado. Con todo, dada a recepción de máis dun centenar de solicitudes na primeira hora na que o formulario de inscrición estivo aberto, optouse por triplicar os recursos destinados a esta formación.
Deste xeito, o ‘webinar’ impartirase en tres sesións, que terán lugar nas próximas semanas, co obxectivo de mostrar ás empresas como desenvolver estratexias de internacionalización a partir de ferramentas de Mercadotecnia Dixital.
En concreto, o seminario será impartido polo fundador e xerente de Esterea Comunicación Dixital, José Alcaniz. A formación tamén incluirá a posibilidade de acceder a titorías personalizadas, que se realizarán por medios telemáticos nunha data acordada entre o relator e a empresa.
O delegado do Estado na Zona Franca, David Regades, explicou na sesión de apertura do curso que a imposibilidade de levar a cabo accións comerciais empresariais debido á crise sanitaria motivou o desenvolvemento desta iniciativa.
Nesta liña, Regades sinalou que, ante esta situación, a Mercadotecnia Dixital pasou a constituír “a ferramenta estratéxica máis potente” da que dispoñen as empresas para impulsar o seu negocio.
