A dirección do festival multidisciplinar ‘The Wild Fest’, que se celebra na parroquia viguesa de San Miguel de Oia, comunicou este luns que a segunda edición do evento queda aprazada ata setembro, debido á crise sanitaria pola pandemia de coronavirus.

Así, este certame sustentable celebrarase os días 4,5 e 6 de setembro, en lugar de en xuño, como estaba previsto, xa que, segundo a organización, “non se podería garantir a normal celebración do evento nin a seguridade e benestar de público e participantes”. “Con esta nova data confiamos e traballamos coa esperanza de que a normalización social que tanto ansiamos sexa, por entón, efectiva”, apuntaron desde o festival.

Os seus responsables traballan agora na reorganización de actividades, como a carreira de obstáculos ‘The Wild Race’ no parque forestal de San Miguel de Oia, que pasará a celebrarse o 6 de setembro.

Na súa primeira edición, que tivo lugar en xuño de 2019, ‘The Wild Fest’ reuniu a máis dun milleiro de persoas que gozaron de música, cinema, gastronomía, camiñadas na natureza e outras actividades.