O alcalde de Vigo, Abel Caballero, ofreceu este luns á Xunta de Galicia “todos os dispositivos municipais” para axudar a frear a pandemia de coronavirus e para “velar pola saúde” dos 600.000 habitantes da área metropolitana.
Segundo trasladou o rexedor, esta oferta xa lla fixo por escrito ao presidente galego, Alberto Núñez Feijóo, aínda que precisou que o Executivo galego aínda non se dirixiu a el desde que se iniciou a crise sanitaria. En todo caso, subliñou que agora non é momento “de política nin de partidos”, porque “o importante é a saúde”, e “o primeiro son as persoas”.
Por outra banda, o alcalde lembrou que o Concello mantén o reforzo na limpeza e desinfección de rúas, e este luns entra en vigor a prohibición de pagar o billete de bus en metálico.
Así mesmo, tal e como estableceu o Goberno a pasada fin de semana, paralizáronse as obras públicas promovidas polo Concello, e adoptáronse medidas para garantir a seguridade nesas zonas durante o tempo en que estean suspendidos os traballos.
No ámbito dos servizos sociais, explicou que se manteñen as medidas para atender persoas vulnerables, e que se entregaron axudas de emerxencia para o pago de hipotecas e alugueres (111 axudas), para pagar o recibo da auga (41 beneficiarios), recibos de comunidades (5 axudas), medicamentos e produtos de farmacia (23) e subministracións de gas e electricidade (49 axudas).
BOLSAS DE COMEDOR
Na mesma liña, incidiu en que tamén se entregou o diñeiro da bolsa municipal de comedor a unha mil familias (50 euros por familia) para que poidan dar para comer aos seus fillos, aínda que non estean a ir ao colexio.
A ese respecto, criticou que a Xunta non estea a adiantar as súas bolsas de comedor, a pesar de que hai familias que necesitan eses recursos. Por iso, anunciou que o Concello está disposto a adiantar o diñeiro desas bolsas autonómicas para sufragar gastos de comedor escolar.
Abel Caballero proclamou que non está “disposto” a que “un só neno de Vigo non teña unha comida decente ao día”, polo que, “se é preciso”, a administración local adiantará o diñeiro das bolsas da Xunta, “que se mostra incapaz de facer fronte a esta cuestión”.
