O Sergas comezou o traslado de pacientes ao hospital do Meixoeiro para liberar camas no Álvaro Cunqueiro, e aumentar a capacidade de hospitalización deste centro con respecto a posibles afectados por coronavirus (COVID-19).

Así anunciuono a Xunta o pasado venres 27 de marzo, pero fontes sindicais denuncian que ese traslado estase facendo pondo en perigo a saúde dos enfermos trasladados e dos propios traballadores sanitarios.

Por iso, denuncian o protocolo para a realización destes traslados sen cumprir as medidas de distanciamento, sen material de desinfección para as ambulancias, sen material de protección e baixo ameazas das empresas privadas concesionarias aos traballadores sanitarios.

Sen distancia de seguridade

“Os traslados de pacientes de alto risco estanse realizando en ambulancias con catro e cinco persoas en cada viaxe.” denuncian dende os sindicatos. Unha medida que incumpre de base o propio decreto aprobado polo goberno para o transporte público (as ambulancias son transporte público) que obriga a que só poidan ir unha persoa por cada fila de asentos, para manter distancia entre os ocupantes. O que debería traducirse en non máis de tres doentes por servizo para garantir as distancias de seguridade.

A maiores destes traslados, habería que incluír ao transporte extrahospitalario das persoas que acoden de xeito programado tratamentos de diálise con ambulancias totalmente cheas, incumprindo tamén o decreto lei. Persoas que logo retornan aos seus domicilios para continuar co confinamento podendo estar xa contaxiadas.

Ambulancias sen desinfectar

O persoal non conta con material para desinfectar as ambulancias. O único produto co que contan agora mesmo, e que foi doado por particulares, é un produto bactericida para uso agro-alimentario e veterinario. “non é un producto biocida nin virucida polo que non serve para desinfectar a ambulancia no caso de que esteamos transportando persoas contaxiadas con coronavirus. “

“De pouco vale que se confine a persoas e que se pida non sair da casa si as propias ambulancias son un foco de contaxios”

Baixo ameazas e con 5 traballadores en corentena

O transporte extrahospitalario estase realizando en condicións de presión para os traballadores e con ameazas por parte dos xefes de servizos aos traballadores que non queiran realizar o transporte de pacientes por non contar con material de seguridade (EPI), o que suporía de facto o incumprimento da propia Lei de Prevención de Riscos Laborais que recolle que o traballador terá dereito a interromper a súa actividade cando considere que entraña un risco grave e inminente para a súa vida ou a súa saúde.

Os Equipos de Protección Individual coñecidos como EPI, chegaron o pasado martes, en parte doados por particulares, pero só se estan a utilizar para o transporte en ambulancias de illamento.

O resto de transportes realízanse sen protección para o persoal sanitario e os doentes; sen desinfectar eficazmente as ambulancias, e con máis carga de persoas do permitido, o que xa se traduciu en cinco traballadores de baixa con sintomatoloxía e á espera de realizar as probas por coronavirus que confirme ou descarte o contaxio.

Fontes sindicais sinalan que se a empresa concesionaria non toma medidas de xeito inmediato, denunciarán á inspección de traballo.