O comité de empresa de Acciona, que se encarga da limpeza do Hospital Álvaro Cunqueiro de Vigo e que preside a CIG, denunciou este mércores que o servizo está “ao bordo do colapso”, debido á baixa de varios traballadores infectados por coronavirus.

O sindicato nacionalista sinalou que a empresa “ocultou” que unha persoa estaba infectada e non solicitou as probas para outra “con sospeitas”, polo que “agora xa son seis os afectados”, todos eles membros do comité.

Ante a falta de persoal, incidiron, o servizo atópase “ao bordo do colapso”, ata o punto de que “xa se está descoidando a limpeza de zonas comúns” do hospital.

Así mesmo, o comité sinalou que, ademais da falta de persoal, porque as novas contratacións “son insuficientes”, hai unha ausencia de coordinación co persoal sanitario, que fai que os traballadores de limpeza reciban indicacións “con falta de criterio unificado e razoable”.

O persoal, que se dotou por iniciativa propia de protocolos de actuación ante a falta de indicacións precisas, denunciou que o servizo de prevención da empresa “está desaparecido”, en lugar de estar “a solucionar as cuestións relativas á formación, coordinación co Servizo de Medicamento Preventivo, xestión de baixas do persoal de risco, etc.”. Todas estas circunstancias fan que o persoal de limpeza se vexa “sobrecargado”.

“Tratamos de manter a calma polo ben da cidadanía e pola propia xestión hospitalaria, pero o tempo que tiñamos para previr xa non o temos. Se as autoridades competentes non fan unha análise real da situación deste hospital, en canto a necesidades materiais e humanas, dubidamos de que, no noso ámbito, que son os residuos e a limpeza, podamos conter eficazmente este virus“, sentenciaron desde o sindicato nacionalista.