O Tribunal Superior de Xustiza de Galicia (TSXG) ditou unha sentenza na que desestima un recurso interposto pola sociedade Novo Hospital de Vigo –concesionaria do Álvaro Cunqueiro– contra a modificación da ordenanza fiscal que o obriga a pagar o Imposto de Bens Inmobles (IBI).

Na sentenza, o alto tribunal galego avala o cobro deste imposto ao amparo da actual ordenanza fiscal, que foi modificada polo goberno local precisamente para que esta sociedade pagase esa taxa a partir de 2019 (970.000 euros anuais).

Segundo argumenta o TSXG, tras a modificación, a ordenanza municipal esixe, para que haxa exención dese imposto, que o centro sanitario sexa público, e que o Sergas sexa tamén suxeito pasivo do imposto (situación que non se cumpre). Ademais, limita a exención do IBI a centros sanitarios públicos nos que se dispense atención primaria.

INCUMPRIMENTO DO CONVENIO DE COOPERACIÓN

No seu recurso, a sociedade concesionaria advertiu de que a modificación da ordenanza fiscal supón un incumprimento do convenio marco de cooperación asinado entre a Xunta, o Sergas e o Concello para a construción do hospital.

Respecto diso, o tribunal sinala que a desestimación do recurso faise “sen prexuízo” de que a sociedade poida depurar pola vía pertinente as consecuencias que se deriven do incumprimento dese convenio marco.

ANTERIOR SENTENZA

O cobro do IBI do hospital vigués xa foi obxecto de controversia hai uns anos, cando a sociedade concesionaria recorreu o cobro do imposto correspondente a 2016. Naquel momento, o TSXG fallou en favor da concesionaria xa que, segundo a ordenanza vixente entón, estaba exenta do pago porque o centro é de propiedade pública (tal e como volve recoñecer nesta segunda sentenza).

VALORACIÓN DE ABEL CABALLERO

Pola súa banda, o alcalde de Vigo, Abel Caballero, trasladou este venres en rolda de prensa a súa satisfacción por este fallo que, na súa opinión, pon de manifesto que o Álvaro Cunqueiro é “un hospital privado”.

O rexedor sinalou que a reforma da ordenanza fiscal (aprobada a finais de 2018) fíxose “para que esta sociedade privada pague o IBI”, e expresou a súa sorpresa porque a Xunta “defende” á entidade privada “en contra do concello”.

Caballero afirmou que, despois de que o TSXG dese “a razón” á administración municipal, “se lle pasara (á concesionaria) o recibo” do IBI de 2019, que ascende a 970.000 euros, que se usarán “en favor dos cidadáns de Vigo”.