Axentes da Policía Local de Vigo detiveron un veciño da cidade, J.B.L., de 36 anos de idade, ao que buscaban como sospeitoso dun roubo con forza cometido no Porriño, e que tentou fuxir dos axentes conducindo de forma temeraria, e mesmo arremeteu contra un coche patrulla.

Segundo confirmaron fontes policiais, os feitos ocorreron na madrugada do martes, cando se produciu un roubo con forza nun local do Porriño, no que fracturaran unha lúa e forzaran unha máquina comecartos, antes de fuxir nun coche.

Dado que o ‘modus operandi’ coincidía cos métodos dun coñecido delincuente, veciño de Vigo, e con numerosos antecedentes, a Garda Civil púxose en contacto coa Policía Local da cidade olívica.

Unha dotación do 092 trasladouse ata o domicilio do sospeitoso, na zona de San Paio, e ao chegar atopáronse con este individuo nun coche, manobrando para estacionar.

FUXIDA E PERSECUCIÓN

Ao decatarse da presenza dos axentes, este home iniciou a marcha bruscamente e fuxiu a gran velocidade, conducindo de forma temeraria, mesmo en dirección prohibida. Durante a súa fuxida puxo en risco a seguridade do resto de condutores e algúns viandantes, como un repartidor de prensa, que tivo que saltar para evitar ser atropelado.

Finalmente, o condutor quedou atrapado nunha rúa sen saída e arremeteu marcha atrás contra o coche patrulla para tratar de abrirse paso. Nese momento, un policía logrou introducirse no vehículo e conseguiu quitar as chaves do contacto.

No forcexeo, ao sospeitoso caéronselle gran cantidade de moedas que levaba encima (presumiblemente procedentes do roubo do Porriño). O home foi detido por un suposto delito de roubo con forza, un delito contra a seguridade viaria e outro de atentado contra axentes da autoridade. Ademais, enfróntase a causas por danos intencionados causados a coche policial e por conducir co carné retirado, pendentes nos xulgados.