O grupo municipal Marea de Vigo criticou este xoves que a ampliación do túnel previsto baixo Porta do Sol, mediante unha nova licitación, é “improvisada”, e reclamou ao goberno local que “repense” o proxecto da peonalización da zona.

Este grupo político lembrou que se fixo unha licitación para a actuación de humanización en superficie e o túnel ata Elduayen, e agora preténdese redactar un novo proxecto e facer unha nova licitación para os metros do paso subterráneo que restan ata o Paseo de Alfonso. “É, como mínimo, unha evidente improvisación, porque tería afección na mobilidade da cidade“, apuntou o portavoz de Marea, Rubén Pérez Correa.

A ese respecto, o concelleiro apuntou que, mentres a convocatoria dos fondos DUSi non estea resolta polo órgano que a tramita (o Ministerio de Facenda), “o proxecto pode ser perfectamente repensado” e os fondos poden ser “adaptados”.

“Non podemos estar situados na cerrazón do Concello a estudar alternativas que non pasen polo tráfico rodado, xa sexa en superficie ou en túnel, polo centro histórico”, engadiu, e lembrou a proposta de Marea de construír aparcadoiros disuasorios nos terreos de Adif en Isaac Peral, na contorna do Auditorio Mar de Vigo, ou nos terreos da estación de buses da Avenida de Madrid, que deixará de estar operativa cando entre en funcionamento o nodo intermodal de Urzáiz.