O delegado do Goberno en Galicia, Javier Losada, reiterou o apoio do Goberno na procura de solucións que garantan a continuidade do estaleiro Barreras e citou respecto diso o acordo de refinanciamento que contou coa participación do Ministerio de Industria, Comercio e Turismo,a través da Compañía Española de Seguro de Crédito á Exportación (CESCE).
Segundo informa a Delegación do Goberno, así llo transmitiu este martes a unha delegación da Federación de Industria, Construción e Agro de UGT en Vigo liderada polo seu secretario xeral, Rubén Pérez, “a quen lle reiterou a confianza do Goberno nas posibilidades do novo proxecto empresarial do estaleiro de Barreras”. Fíxoo tras a confirmación de que Ritz Carlton presentará o seu plan para salvar o estaleiro vigués de entrar en concurso de acredores.
Durante o encontro, Javier Losada analizou cos responsables sindicais a situación actual da compañía viguesa tras a presentación do acordo de refinanciamento da débeda, “que permite afrontar o futuro inmediato para os seus traballadores e a industria auxiliar acredora da mesma cunha nova perspectiva”.
Respecto ao mesmo, destacou que o estaleiro pasará a ter “unha dirección profesional e independente para garantir a xestión transparente e centrada na continuidade do estaleiro, que é o que precisa actualmente esta compañía”.
Finalmente pediu á Xunta lealdade no traballo conxunto das administracións e que se sume ao novo proxecto, lembrándolle “que a única prioridade agora debe ser garantir o futuro industrial e laboral de Barreras e do sector naval de Galicia”.
