O Grupo PSA producirá na súa planta de Vigo o novo Peugeot 2008 a un ritmo de 1.000 unidades diarias desde finais do primeiro trimestre deste ano, segundo informou a empresa, que puxo en marcha dous novos equipos de traballo (tarde e noite) integrados por 600 persoas cada un.

Con vocación de ser “un dos grandes referentes” en materia de tecnoloxía, confort, prestacións e respecto ao medio ambiente do segmento dos todocamiños compactos, o novo modelo da firma francesa, ademais de supor o lanzamento da plataforma CMP na factoría viguesa, trouxo consigo novidades en técnicas, procesos e instalacións.

“Un vehículo tan cargado de innovación require unha nova forma de enfocar a produción de automóbiles. Un reto que esixe un alto nivel de competitividade e cualificación. Peugeot confía plenamente no centro de Vigo do Grupo PSA para cimentar o éxito dun modelo clave para o futuro da marca”, asegurou a directora xeral da firma para España e Portugal, Hélène Bouteleau.

A nova xeración do todocamiño de Peugeot permite elixir entre versións gasolina, diésel e eléctricas grazas á nova plataforma modular multi-enerxía CMP, que se estrea na planta olívica.

“É a base técnica sobre a que se constrúe o vehículo, xa que integra o chasis, o motor, a batería, a transmisión e a suspensión. O seu carácter modular permite ofrecer unha gran variedade de siluetas aos clientes. Ademais, fai posible que as versións térmicas e eléctricas do novo Peugeot 2008 poidan fabricarse na mesma liña de produción: o Sistema 1 do centro de Vigo”, subliñou a compañía.

Por iso, a factoría galega tivo que afrontar unha transformación “profunda” dos seus procesos de produción e das súas instalacións. No Sistema 1 implantáronse innovacións como o sistema de descarga automática e de visión artificial nas liñas de prensas, o control xeométrico de calidade por visión artificial e a axuda visual e intelixente ao operario, entre outros avances.

Desta maneira, impartíronse 35.000 horas de formación para familiarizar os traballadores cos novos procesos. A industrialización do novo 2008 realizouse en 49 semanas, unha marca dentro do Grupo PSA.

Coas novas contratacións, en total 2.500 traballadores estarán directamente vinculados á produción deste modelo nos próximos anos.