A Policía Local de Vigo procedeu ao balizamento dun patio interior dun edificio na rúa Jenaro de la Fuente, ante o risco de derrube inminente dun inmoble lindeiro, que se atopa en estado ruinoso.

Segundo informaron fontes policiais, unha dotación do 092 acudiu este mércores pola tarde a Jenaro de la Fuente, alertada por un veciño que vira como caían tellas dun edificio lindeiro co seu.

Este veciño, presidente da comunidade do seu edificio, facilitou aos axentes a entrada a un patio interior, desde onde se puido constatar que o outro edificio está en estado ruinoso. A Policía solicitou aos bombeiros que valorasen o inmoble e puideron localizar un home de 45 anos de idade, que vive no baixo dese edificio.

Os policías locais informáronlle do risco e apercibíronlle en varias ocasións de que debía abandonar a vivenda, posto que o edificio “en calquera momento” podería “vir abaixo”. Tras a valoración dos bombeiros, a Policía decidiu balizar o patio interior.