O Xulgado do Contencioso-Administrativo número 1 de Vigo condenou á Xunta recoñecer o abono do Índice de prezos ao consumidor (IPC) galego a unha funcionaria e a ingresarlle o importe correspondente á suma do mesmo durante o cinco anos posteriores á data da reclamación, ademais dos intereses xerados.
A sentenza, contra a que cabe recurso ante o Tribunal Superior de Xustiza de Galicia (TSXG), resolve así o recurso presentado por unha traballadora de xestión procesual da Administración de Xustiza ante a desestimación por resolución do director xeral de Xustiza en agosto de 2019 dunha solicitude presentada para recibir o abono do IPC galego.
Ademais, o xuíz indicou que se trata dunha “situación xurídica individualizada” na que se aborda o “primeiro pleito resolto nesta comunidade autónoma sobre o particular”. Así, apuntou que, dadas “as serias dúbidas de dereito que a nova cuestión controvertida expón”, non cabe efectuar unha condena en costas ao Goberno galego.
Os fundamentos xurídicos da sentenza recollen que, aínda que o concepto retributivo foi contemplado en gastos de persoal de orzamentos autonómicos, o persoal da Administración de Xustiza de Galicia “non percibiu en ningún momento” o abono do IPC galego. Deste xeito, o titular do xulgado tamén considerou que o feito de que a transferencia do persoal da Administración de Xustiza desde o Estado á comunidade autónoma fose posterior á creación do IPC galego “non impide” a súa aplicación aos funcionarios.
