Axentes da Policía Nacional da Comisaría de Vigo detiveron a catro novos de nacionalidade portuguesa e domicilio no Porto, de entre 20 e 24 anos de idade, como presuntos autores dun delito de ameazas graves.
Segundo informaron fontes policiais, os feitos tiveron lugar na madrugada deste venres, cando se recibiu unha alerta na central do 091 por unha liorta nunha discoteca da rúa Areal.
Os axentes observaron ao chegar un tumulto na entrada do local e, no medio, un grupo de varias persoas vociferando e lanzando golpes coas mans a outro grupo que tentaba refuxiarse no interior da discoteca.
Co apoio doutras dotacións de Policía Nacional e Policía Local lograron separalos e procederon ao rexistro dos presentes. Nese proceso, os axentes incautáronse dunha navalla plegable e outra de tipo bolboreta.
Segundo as testemuñas, os catro sospeitosos agrediron aos compoñentes do equipo de seguridade e ameazáronos de morte, exhibindo as navallas. Nese momento, procedeuse á detención deses catro mozos, un dos cales tivo que ser reducido porque se resistiu e se mostrou hostil ante os policías.
Os agredidos e os agresores foron atendidos en centros sanitarios e, posteriormente, os segundos foron trasladados a dependencias policiais, onde se comprobou que carecen de antecedentes, quedando á espera de ser postos a disposición do xulgado.
