O acondicionamento da contorna do complexo intermodal de Urzáiz en Vigo, no que se integra a estación do AVE deseñada por Thom Mayne, incluirá a “humanización” de espazos urbanos como as zonas que quedan entre o complexo e os accesos viarios, ou a nova praza pública, cun investimento de 3,4 millóns de euros.

Así o avanzou este xoves o rexedor olívico, Abel Caballero, quen confirmou que esas actuacións xa contan co visto e prace do Ministerio de Fomento e serán incluídas na addenda do convenio sobre as actuacións nese complexo (levadas a cabo por Adif, Xunta e Concello).

Segundo explicou, destinaranse 900.000 euros a acondicionar os chamados espazos intersticiais, esas zonas que quedarán entre a estación, a autoestrada, os viarios e a praza. Así mesmo, a humanización da zona entre a estación de tren e a terminal de buses custará outros 900.000 euros e, adicionalmente, investirase 1,6 millóns na construción da nova praza.

Eses 3,4 millóns adicionais serán achegados por Adif (un 74 por cento), o Concello de Vigo (un 21 por cento) e, en menor contía, a Xunta de Galicia (o 4 por cento restante).